कार्यक्रमका सभापति महोदय,
माननीय सूचना तथा सञ्चार मन्त्री ज्यू,
नेपाल टेलिभिजनका सम्पूर्ण कर्मचारी मित्रहरु,
उपस्थित दिदी बहिनी तथा दाजूभाइहरु,
सञ्चारकर्मी मित्रहरु,
देशको पहिलो र पुरानो टेलिभिजन, नेपाल टेलिभिजन आजबाट ३२ बर्ष पूरा गरी ३३ औं वर्षमा प्रवेश गरेको सुखद अवसरमा नेपाल सरकार र मेरो व्यक्तिगत तर्फबाट नेपाल टेलिभिजन परिवारलाई हार्दिक बधाई र शुभकामना दिन चाहन्छु । यस अवसरमा आम जनतालाई सूचना तथा जानकारी उपलब्ध गराउने सन्दर्भमा नेपाल टेलिभिजनले खेलेको भूमिकाको उच्च प्रशंसा गर्न चाहन्छु ।
वि.सं.२०४१ सालमा आजकै दिन अर्थात् माघ १७ गतेबाट परियोजनाका रुपमा स्थापना भई २०४२ साल पुसबाट नियमित प्रशारण शुरु गरेको नेपाल टेलिभिजनले सूचना प्रवाहमा तीन दशक भन्दा लामो यात्रा तय गरेको छ । यस बीचमा मुलुकले समेत तीन भिन्न प्रकारका शासन व्यवस्थाको अभ्यास गरेको छ । त्यस अर्थमा नेपाल टेलिभिजन पछिल्ला तीन दशकमा भएका सवै परिवर्तनको साक्षी हो भन्न सकिन्छ । अझ स्पष्ट रुपमा भन्दा यो सूचना प्रवाह र टेलिभिजन प्रशारणका क्षेत्रमा भएका विकासको तस्वीर हो । तर, अब विगतबाट पाठ सिक्दै आगामी दिनका चुनौतीलाई अवसरमा बदल्दै परिवर्तनबाट प्राप्त उपलव्धिलाई संस्थागत गर्नु हामी सबैको दायित्व भएको छ । यस क्रममा नेपाल टेलिभिजन पनि परिवर्तित सन्दर्भको राष्ट्रिय दायित्व निर्वाह गर्न संस्थागत रुपमै सक्षम छ भन्ने विश्वाश मलाई छ ।
मुलुकमा नयाँ संविधान जारी भई हामी संविधान कार्यान्वयनको चरणमा छौं । संविधानको कार्यान्वयनको प्रमुख पक्ष संघीयताको कार्यान्वयन भएको सन्दर्भमा यसलाई सारभूत रुपमा कार्यान्वयन गर्न विद्यमान संरचनालाई संविधानमा व्यवस्था गरिएअनुरुप तल्लो तहमा अधिकार लैजाने गरी रुपान्तरण गर्नु आवश्यक छ ।
यसै सन्दर्भमा नेपाल टेलिभिजन पनि संघीय स्वरुप अनुसारको संरचनामा जान थालेकोमा मलाई खुशी लागेको छ । यस क्रममा मध्य र सूदुर पश्चिममा प्रशारण बिस्तार गर्न पुनःसंचालित बाँकेको कोहलपुरस्थित क्षेत्रीय प्रशारण केन्द्रको परिक्षण प्रशारणको मैले भर्खरै मात्र शुभारम्भ गरेको छु । पूर्वाञ्चलको इटहरीमा क्षेत्रीय प्रशारण सुरुवात गर्नका लागि भवन निर्माणको कार्य र सबै प्रदेशमा प्रशारण बिस्तारको गृहकार्य भइरहेको जानकारी पाउँदा खुशी लागेको छ । यसैगरी २०७२ सालमा आएको भूकम्पका कारण भएको क्षति र प्रशारणमा आइपरेको अप्ठेरोलाई महशुस गर्दै कोहलपुर र इटहरीलाई विपद् व्यवस्थापन र वैकल्पिक प्रशारण केन्द्रको रुपमा समेत सञ्चालन गर्ने तयारी भइरहेको कुरा जानकारी पाउँदा थप खुशी र गर्वको अनूभूति भएको छ ।
यस सन्दर्भमा संघीयताको मर्मलाई जनजनमा स्थापित गर्न सबै क्षेत्र, वर्ग, लिङ्ग, जाति, भाषाभाषी, धर्म र संस्कृतिको स्वर र अनुहार नेपाल टेलिभिजनमा समान रुपमा प्रतिविम्वित् हुनुपर्छ । सबैले नेपाल टेलिभिजनसँगको अपनत्व अनुभूत गर्नुपर्छ । ‘हुने खाने’ र ‘हुँदा खाने’ सबैका लागि समान पहुँच बनाउन, नेपाल टेलिभिजन सफल बन्नुपर्छ । त्यस दिशामा नेपाल टेलिभिजन अगाडि बढ्न सकोस्, मेरो शुभेच्छा छ ।
त्यसो त टेलिभिजन, विश्वव्यापी रुपमै प्रविधि र प्रशारणको तीव्र प्रतिस्पर्धामा छ । प्रशारण प्रविधिको प्रयोगमा गरिने परिवर्तनसँगै विषयवस्तुको छनौट र प्रस्तुतिमा हुने नयाँपनले टेलिभिजनको प्रभावकारिता सञ्चार जगतमा अहिलेसम्म पनि पहिलो स्थानमा छ । नेपाल टेलिभिजनले पनि पछिल्ला प्रविधिको प्रयोगलाई प्राथमिकता दिएको र अन्र्तराष्ट्रिय मापदण्ड अनुसार आफ्नो प्रसारणलाइ डिजिटल सेवामा रुपान्तरण गर्न डिजिटल ट्रान्समिटरबाट परीक्षण प्रशारण प्रारम्भ गरिसकेको छ । यसको पनि मैले आज औपचारिक शुभारम्भ गरेको छु । डिजिटाइजेशनसँगै नेपाल टेलिभिजनको प्रसारणमा गुणस्तरीयता र विषयगत विविधतामा वृद्धि हुने मेरो विश्वास छ । त्यसैगरी नेपाल टेलिभिजन, निकट भविष्यमै हाइ–डिफिनेशन प्रविधिमा जाने तयारीमा लागेको जानकारी प्राप्त भएको छ । यस कार्यमा नेपाल सरकारको तर्फबाट आवश्यक सहयोग गर्ने विश्वास यहाँहरुलाई दिलाउन चाहन्छु ।
नेपाल टेलिभिजनको ३२ औं वार्षिकोत्सव समारोहमा सहभागी सबै महानुभावहरु तथा प्रत्यक्ष प्रशारण हेरिरहनुभएका दिदीबहिनी तथा दाजुभाइहरु ।
बर्तमान सरकार संविधान संशोधन गरी यसको स्वीकार्यता फराकिलो बनाई आगामी १ वर्षभित्रै तीनै तहको निर्वाचन गर्ने अठोटका साथ अगाडि बढिरहेको छ । सरकारले तय गरेको यो लक्ष्यलाई प्राप्त गर्न राष्ट्रिय प्रशारण संस्था, नेपाल टेलिभिजनको महत्वपूर्ण भूमिका रहन्छ । सञ्चार माध्यम सरकार र सामान्य नागरिकबीच सम्वाद स्थापित गर्ने माध्यम हुन् । त्यसैले नेपाल टेलिभिजनले अब सिंहदरवार र सीमान्त वर्ग, क्षेत्र र समुदायबीचको सम्वादका लागि सम्वाहक बन्नुपर्छ । यसले सामाजिक सदभाव, सहिष्णुता र राष्ट्रिय एकतालाई अझ बलियो बनाउने छ । यस क्रममा नेपाल टेलिभिजनले देखाउने तस्वीर र सुनाउने सबैको समावेशी स्वरले सशक्तिकरणमा सघाउने छ भने सशक्तिकरणबाट मुलुकको समृद्धिमा सहयोग पुग्नेछ ।
सत्य, सन्तुलित र विश्वसनीय समाचारको प्रशारण नेपाल टेलिभिजनको ब्राण्ड बनेको छ । संविधान कार्यन्वयनका लागि सरकारका तर्फबाट भइरहेको इमान्दार प्रयास र निर्वाचन सम्पन्न गने क्रममा आफ्नो स्थापित ब्राण्डलाई कायम राख्दै नेपाल टेलिभिजनका साथै सबै सञ्चार माध्यमहरुले थप सम्वेदनशील र जिम्मेवार भएर रचनात्मक र सकारात्मक भूमिका निर्वाह गर्नुहुनेछ भन्ने अपेक्षा पनि लिएको छु । लोकतन्त्रको मूल्य र मान्यताअनुसार सञ्चार माध्यमहरुको निष्पक्षता र सम्पादकीय स्वतन्त्रताको राज्यले सधंै सम्मान गर्नेछ । प्रेस स्वतन्त्रता र लोकतन्त्र एउटै मानिसका दुई पाइला हुन् । जुन एकपछि अर्को तर सँगसँगै चल्दछन् । यो शास्वत सत्यलाई हामी सबैले बुझेका छांै ।
कर्मचारी मित्रहरु,
नेपाली टेलिभिजनको जननी, नेपाल टेलिभिजनको इतिहास साँच्चै नै गौरवपूर्ण छ । सरकार अन्तर्गत सञ्चालित निकाय अन्य क्षेत्रका लागि रोल मोेडेल हुनुपर्ने सन्दर्भमा नेपाल टेलिभिजन राज्य मातहतको टेलिभिजन भएकोले यसको गौरव र प्रतिष्ठा सबै नेपालीसँग गाँसिएको छ । यो यथार्थतालाई हृदयदेखि नै मनन् गर्दै नेपाल टेलिभिजनको दिगो, दरिलो र सुन्दर भविष्य निर्माणका लागि तपाईहरु नयाँ सिर्जनाका साथ दिनरात, २४ सै घण्टा मेहनत गरिरहनु हुनेछ । मैले बुझेसम्म, नेपाल टेलिभिजन प्रविधिले तुलनात्मक रुपमा पूर्ण छ, श्रोत साधनले सम्पन्न छ । पुरानो हुनुको अर्थमा तपाई टेलिभिजनकर्मीहरु पनि परिपक्व हुनुहुन्छ । यसको स्वभाविक लाभ तपाइहरुलाई छ । तपाईहरुको परिपक्वताले नेपाल टेलिभिजनका सबै तीनवटै च्यानलहरु थप लोकप्रिय हुँदै जानेछन् भन्ने मलाई विश्वास छ । किनकि, सबैले रुचाउने प्रिय हुन सक्दा मात्र इतिहास जीवन्त रहन्छ ।
अन्त्यमा,
म यस महत्वपूर्ण अवसरमा नेपाल टेलिभिजन स्थापनाकालदेखि यसको विकास क्रममा संलग्न तर हाल सेवा निवृत्तहरु सबैको योगदानको स्मरण गर्न चाहन्छु । आज सम्मान प्राप्त गर्नुहुने सबैलाई बधाइ ज्ञापन गर्दछु । यसका साथै ३३ औं वर्ष प्रवेशको यस सुखद अवसरमा नेपाल टेलिभिजनका सम्पूर्ण पत्रकार, प्राविधिक र सबै कर्मचारी साथीहरुलाई पुनः एकपटक शुभकामना व्यक्त गर्दछु, धन्यवाद ।
१७ माघ, २०७३